വാടക കേട്ടാല് അന്തം വിട്ടു പോകും. വെറും 395 രൂപ.. അതും എസിയില് കിടക്കുവാന്. എന്താ അത്ഭുതം തോന്നുന്നില്ലേ? ഇത് എവിടെയാണെന്നായിരിക്കും ഇപ്പോള് ചിന്തിക്കുന്നത്. പറഞ്ഞുതരാം.
കൊച്ചി മെട്രോയുടെ എം ജി റോഡ് സ്റ്റേഷനിലാണ് എല്ലാവര്ക്കും ഉപകാരപ്രദമായ ഒരു ഡോര്മിറ്ററി തുടങ്ങിയിരിക്കുന്നത്. പീറ്റേഴ്സ് ഇന് എന്ന പേരിലാണു ഡോര്മെട്രിയുടെ പ്രവര്ത്തനം. ഇരുന്നൂറ് കിടക്കകളും നാല്പത് ടോയിലെറ്റുകളുമുണ്ട് ട്രെയിന് കമ്പാര്ട്ട്മെന്റിന്റെ മാതൃകയിലുള്ള ഈ എ സി ഡോര്മെട്രിയില്. കൊച്ചിയിലെത്തുന്ന ആര്ക്കും മിതമായ ചിലവില് ഇവിടെ താമസിക്കാം. ഒരു ദിവസം താമസിക്കാന് 395 രൂപയാകും. സ്ത്രീകള്ക്ക് പ്രത്യേകം കമ്പാര്ട്ട്മെന്റ് മുറികളുമുണ്ട്. മൊബൈല് ചാര്ജിംഗ് പോയിന്റ് റീഡിങ്ങ് ലൈറ്റ്, വൈഫൈ, ലോക്കര് തുടങ്ങിയ സംവിധാനങ്ങളുമുണ്ട്. ഇന്ത്യയില് മെട്രോ സ്റ്റേഷന് കേന്ദ്രമാക്കിയിട്ടുള്ള ആദ്യത്തെ ഡോര്മിറ്ററി ആണിത്.
താമസക്കാര്ക്ക് സുരക്ഷിതവും വൃത്തിയുള്ളതുമായ സ്ഥലത്ത് സ്വച്ഛമായ വിശ്രമമാണു പീറ്റേഴ്സ് ഇന് മെട്രോ സ്റ്റേഷനുകളില് ഒരുക്കുന്ന ഡോര്മെട്രികളില് പ്രദാനം ചെയ്കയെന്നു കമ്പനിയുടെ മാനേജിങ് ഡയറക്ടര് ഫ്രാന്സിസ് മുക്കാണിക്കല് പറഞ്ഞു. ഈ സംവിധാനം മറ്റുള്ള സ്റ്റേഷനുകളിലേക്കു കൂടി വ്യാപിപ്പിക്കാനാണു പദ്ധതി. വിവാഹ ആവശ്യങ്ങള്ക്കായും യാത്രാ പരിപാടികള്ക്കുമായും എത്തുന്നവര്ക്കു ചെലവ് കുറഞ്ഞ രീതിയില് ഒന്നിച്ചു താമസിക്കാനുള്ള അവസരമാണ് ഇവിടെ ഒരുക്കിയിട്ടുള്ളത്. കൂടാതെ 900 രൂപയ്ക്ക് കൊച്ചിയിലെ കാഴ്ചകള് കാണാനുള്ള അവസരവും ഒരുക്കും. രാത്രി ഏഴിനു ചെക്ക് ഇന് ചെയുന്ന ഒരാള്ക്കു രാവിലെ എട്ടു വരെ ഇവിടെ കഴിയാം. പകല് സമയ വിശ്രമത്തിനും അവസരമുണ്ട്. ഒരു രാത്രി താമസത്തിന് 395 രൂപയാണു ഫീസ്. കൂടുതല് മെച്ചപ്പെട്ട സൗകര്യങ്ങളുള്ള കംപാര്ട്മെന്റ് മുറികളും ഉണ്ട്. കൂട്ടമായി എത്തുന്നവര്ക്ക് പ്രത്യേക പാക്കേജുകളും ഉണ്ടാകും. എം എല് എമാരായ എസ്. ശര്മ, പി. ടി. തോമസ്, ഡൊമനിക് പ്രസന്റേഷന്, വി.ഡി. സതീശന്, മേയര് സൗമിനി ജയന്, കെ എം ആര് എല് എം ഡി മുഹമ്മദ് ഹനീഷ് തുടങ്ങിയവര് ചേര്ന്നാണ് എം. ജി. റോഡ് മെട്രോയിലെ പീറ്റേഴ്സ് ഇന് എന്ന എസി ഡോര്മെട്രി സംവിധാനം പൊതുജനങ്ങള്ക്കായി തുറന്നു കൊടുത്തത്. അന്ന മറിയ ഏജന്സീസിനാണു നടത്തിപ്പു ചുമതല. ഫോണ്: 77366 66181.
إرسال تعليق